Կամչատկան դրախտ է այն մարդկանց համար, ովքեր փնտրում են արկածներ։ Հրաբխային գագաթները, գեյզերներն ու գեղեցիկ բնապատկերները ստեղծում են յուրահատուկ մթնոլորտ։ Սակայն պետք չէ մոռանալ անվտանգության կանոնների մասին։

Եթե պլանավորում եք վրանակաց Կամչատկայի հրաբխային հատվածներում, ապա պետք է պատրաստ լինեք փոփոխական եղանակին և բարդ տեղանքին։

Այս բլոգում կգտնեք այն իրերը, որոնք անհրաժեշտ են հրաբխային հատվածներում վրանակացի համար։

Լրացուցիչ խորհուրդներ

• Վերցրեք հեշտ և արագ տեղադրվող վրան:
• Եթե ​​նախատեսում եք գիշերել հրաբխի մոտ, ընտրեք դիմացկուն հատակով վրան։
• Վրանի երկաթյա ձողերը պետք է լինեն ամուր՝ ուժեղ քամու պայմաններում կայուն մնալու համար:

Կամչատկայում, նույնիսկ ամենատաք սեզոնին, գիշերները կարող են լինել շատ ցուրտ։

Ընտրեք քնապարկ, որը նախատեսված է բավականին ցածր ջերմաստիճանի համար և որակյալ գորգ, որը կպաշտպանի սառը հատակից:

Կամչատկան հարուստ է լճերով և գետերով, սակայն այնտեղ ջուրը կարող է պարունակել հրաբխային հանքանյութեր կամ մոխիր։ Դրա համար խմելուց առաջ միշտ պետք է ֆիլտրել ջուրը։ Կարող եք օգտագործել հատուկ հաբեր կամ ջրի ֆիլտր։ Sawyer Squeeze-ի կամ SteriPen-ի պես ֆիլտրները արդյունավետ են և արագ մաքրում են ջուրը՝ ապահովելով անվտանգություն և հարմարավետություն:

Լրացուցիչ խորհուրդներ

• Միշտ ունեցեք պահեստային մաքրող հաբեր կամ ֆիլտրներ, որոնք կօգտագործեք ձեր հիմնական տարբերակի խափանման դեպքում։
• Ուշադրություն դարձրեք ջրի որակին այնպիսի վայրերում, որտեղ կան ակտիվ հրաբուխներ կամ կենդանիներ, որոնք կարող են մուտք գործել դեպի ջրի աղբյուրներ:

Եղանակը Կամչատկայում կարող է փոխվել ցանկացած պահի` արևոտ օրը կարող է դառնալ ամպամած և անձրևային: Այդ իսկ պատճառով խորհուրդ ենք տալիս հագնվել շերտերով։

Սկսեք բազային շերտից, որը հեռացնում է խոնավությունը՝ մաշկը չոր պահելու համար: Այնուհետև ունեցեք միջին շերտ և ջրակայուն շերտ, որը նաև կպաշտպանի քամուց։

Լրացուցիչ խորհուրդներ

• Ձեզ հետ ունեցեք նաև ձեռնոցներ, տաք գլխարկ և գուլպաներ՝ ցրտից, քամուց և մոխրից պաշտպանվելու համար:
• Պատրաստ եղեք ջերմաստիճանի հանկարծակի փոփոխություններին, հատկապես, եթե գտնվում եք հրաբխի վրա կամ երկրաջերմային տարածքների մոտ:
• Կրեք ջրակայուն հագուստ կամ ունեցեք անձրևապաշտպան թիկնոց՝ թրջվելուց խուսափելու համար։

Այս ուղղությունը հրաբխային է, ուստի կարևոր է ընտրել որակյալ կոշիկներ։

Դրանք պետք է լինեն թեթև, ջրակայուն, լինեն ոտքի համար հարմար և ունենան հաստ տակացու։

Պետք է լինեն սովորականից մեկ համար մեծ, վայրէջքների ժամանակ ոտքը չվնասելու համար։

Լրացուցիչ խորհուրդներ

• Վերցրեք Ձեզ հետ արշավական կոշիկներ, որոնք կունենան հաստ տակացու և կպաշտպանեն սրունքները՝ քարքարոտ կամ անհարթ տեղանքով քայլելու ժամանակ։
• Ընտրեք ջրակայուն և շնչող կոշիկներ հարմարավետությունը ապահովելու համար։
• Անպայման մի քանի անգամ հագեք կոշիկները արշավի գնալուց առաջ՝ ոտքերը չվնասելու համար։

Կամչատկայի վայրի բնության պայամններում արշավները կարող են մի փոքր դժվար լինել, հատկապես հրաբխային տարածքներում, որտեղ չկան լավ պահպանված արահետներ: Այդ պատճառով էլ կարևոր է ունենալ լավ GPS-սարք կամ կողմնացույց։ Դժվար հասանելի պայմաններում քարտեզները և նման սարքերը ձեզ կօգնեն հեշտ կողմնորոշվել։

Կամչատկայում կան բազմաթիվ ակտիվ հրաբուխներ և վրանակացի ժամանակ պետք է պաշտպանվել դրանց առաջացրած ծխից: Այն անհարմարություն է առաջացնում աչքերի, մաշկի և շնչուղիների համար, ուստի անհրաժեշտ է ունենալ լավ որակի դիմակ, ակնոց և բաֆ՝ դեմքի լրացուցիչ պաշտպանության համար:

Լրացուցիչ խորհուրդներ

• Արդյունավետ ֆիլտրացմամբ դիմակը (օրինակ՝ N95 ռեսպիրատորը) կպաշտպանի շնչուղիները մոխրից:
• Անվտանգության ակնոցները կպաշտպանեն աչքերը մոխրից և փոշուց, որոնք կարող են առաջացնել ծանր գրգռվածություն և անհանգստություն:
• Բաֆը կամ շարֆը կպաշտպանեն ձեր դեմքը՝ քչացնելով շփումը մոխրի հետ: Եթե տարածքում կան ծխի ամպեր, ավելի լավ է մնալ վրանում:

Կամչատկայի տեղանքը կարող է չափազանց անկանխատեսելի լինել, և օգնությունը միշտ չէ, որ հասանելի է: Անպայման վերցրեք առաջին օգնության պարագաներ, հրդեհաշիջման սարքավորումներ և լապտեր:

Լրացուցիչ ապահովության համար ունեցեք արբանյակային հեռախոս կամ անձնական տեղորոշիչի սարք (PLB), որպեսզի կարողանաք օգնության դիմել արտակարգ իրավիճակների դեպքում:

Վայրի բնության մեջ դժվար է գտնել սնունդ, այդ իսկ պատճառով պետք է նախապես վերցնել սննդի պաշար։ Կոմպակտ գազի այրիչները և խոհանոցային սպասքի հավաքածուն կարևոր են նման արշավների ժամանակ: Խորհուրդ ենք տալիս ձեզ հետ վերցնել ածխաջրերով հարուստ ուտելիքներ, օրինակ բանջարեղեն, ընդեղեն, սերմեր և մրգեր։ Կարող եք նաև ունենալ նախապես պատրաստված և սառեցրած ուտեստներ։

Կամչատկայում անգամ զով եղանակի ժամանակ պետք է պաշտպանվել արևից, հատկապես բարձր լեռնային կամ հրաբխային տարածքներում: Ձեր մաշկը պաշտպանելու համար պետք է ունենալ լավ արևապաշտպան քսուք:

Խորհուրդ ենք տալիս ընտրել դեղատներից՝ 50 SPF։

Նաև ցանկալի է ունենալ սփրեյ, որը վանում է միջատներին, քանի որ ամռան ամիսներին նրանք լինում են բավականին ակտիվ։