Կլյուչևսկայա Սոպկան Կամչատկայի ամենահայտնի հրաբուխն է և ունի 4750 մետր բարձրություն։ Այն համարվում է աշխարհի ամենաակտիվ հրաբուխներից մեկը:

Այն վերջին անգամ ժայթքել է՝ 2000-ականների սկզբին:

Կան բազմաթիվ արշավներ դեպի Կլյուչևսկայա Սոպկայի ստորոտը, իսկ նրանք, ովքեր ունեն լեռնագնացության փորձ, կարող են բարձրանալ անգամ մինչև գագաթ։

Բարձրանալը բավականին բարդ է, սակայն այդ ամենը հաղթահարելուց հետո ձեր առաջ բացվում է Կամչատկայի հրաբխային լանդշաֆտի, խառնարանների և լավայի հսկայական դաշտերի հիասքանչ տեսարաններ:

Կան նաև ուղղաթիռներով տուրեր, որոնց ընթացքում դուք կարող եք տեսնել Կլյուչևսկայա Սոպկան վերևից, ինչպես նաև հիանալ մոտակա այլ հրաբուխներով, ինչպիսիք են Բեզիմյանը և Շիվելուչը:

Շիվելուչը Կամչատկայի մեկ այլ մեծ հրաբուխ է, որը գտնվում է թերակղզու հյուսիս-արևմտյան մասում։

Ունի 3283 մետր բարձրություն և համարվում է Կամչատկայի ամենաակտիվ հրաբուխներից մեկը։ Շիվելուչը հայտնի է իր մշտական ​​ակտիվությամբ՝ ժայթքումներով, գոլորշու ֆումարոլներով և լավայի պարբերական հոսքերով, ինչը նրան դարձնում է հրաբխագետների մշտական ​​ուշադրության առարկա։

Չնայած այն հանգամանքին, որ Շիվելուչը Կլյուչևսկայա Սոպկայի պես բարձր չէ, այն հաճախակի ակտիվության շնորհիվ ստեղծում է անհավատալի տեսարաններ։

Հրաբխային ժայթքումները հաճախ ուղեկցվում են լավայի հոսքերով և մոխրից գոյացած ամպերով: Շրջապատող լանդշաֆտը ապշեցուցիչ է իր կարծրացած լավայի հոսքերով, որոնք արշավները դարձնում են ավելի դժվար և անմոռանալի:

Մուտնովսկի հրաբուխը ունի 2322 մետր բարձրություն։ Այստեղ արշավի գնալը յուրաքանչյուրի համար նոր փորձ է։

Այս հրաբուխը գտնվում է թերակղզու հարավային մասում և պարբերաբար գոլորշի և գազեր է արտանետում իր խառնարանից՝ այցելուներին հնարավորություն տալով զգալու նրա կենդանի ուժը:

Կան արշավներ հատուկ նրանց համար, ովքեր ցանկանում են մոտիկից տեսնել հրաբխային ակտիվությունը։ Ճանապարհը անցնում է գոլորշու օդանցքների, ֆումարոլների և տաք աղբյուրների միջով։ Քայլարշավն ինքնին դժվար է, բայց նրա գեղեցկությունը արդարացնում է ադ ամենը։

Տոլբաչիկը բարդ հրաբխային համակարգ է, որը ներառում է երկու մեծ հրաբուխները՝ Պլոսկի Տոլբաչիկը և Օստրի Տոլբաչիկը։ Դրանց ժայթքումները տեղի են ունեցել անցյալ դարում։ Հրաբուխը հատկապես հայտնի դարձավ 1975-1976 թվականների իր ժայթքումով։ Այն Կամչատկայի պատմության մեջ ամենամեծերից մեկն էր, որը ստեղծեց հսկայական լավայի դաշտեր, որոնք մնացել են մինչ օրս:

Լավայի այս հոսքերը ստեղծել են զարմանալի սև լանդշաֆտ, որտեղ ժամանակ առ ժամանակ կարելի է տեսնել բույսերը, որոնք դանդաղորեն հարմարվում են դաժան պայմաններին:

Ճանապարհորդները կարող են ուսումնասիրել Տոլբաչիկի ստորին լանջերը և քայլել 1975 թվականի ժայթքումից հետո ձևավորված լավայի դաշտերով։ Նրանք, ովքեր սիրում են դժվար հասանելի վայրեր, կարող են մագլցել հրաբխային կոների վրա և նայել խառնարանների մեջ՝ Կամչատկայի ուժն ու վեհությունը զգալու համար:

Ավաչինսկին Կամչատկայի ամենամատչելի հրաբուխներից մեկն է, որը իդեալական է այն ճանապարհորդների համար, ովքեր ցանկանում են տեսնել ակտիվ հրաբուխ՝ չհեռանալով քաղաքային պայմաններից:

Այն ունի 2741 մետր բարձրություն և համարվում է Կամչատկայի ամենացածր գագաթներից մեկը, բայց իր գագաթից բացում է հիասքանչ տեսարաններ դեպի շրջակա վայրեր:

Արշավը միջին բարդության է, գագաթից բացվում է տեսարան դեպի Խաղաղ օվկիանոս և Կորյակսկի հրաբուխ: Թեև այն այնքան ակտիվ չէ, որքան տարածաշրջանի որոշ այլ հրաբուխներ, նրա ֆումարոլներն ու ծխացող խառնարանը նրան հատուկ հմայք են հաղորդում և դարձնում այն ​​գրավիչ վայր ճանապարհորդների համար:

Գորելին հայտնի է իր երկրաջերմային առանձնահատկություններով: Սա 1829 մետր բարձրությամբ հրաբուխ է, բազմաթիվ խառնարաններով, որոնք պարունակում են թթվային լճեր և տաք աղբյուրներ:

Այցելուները կարող են քայլել հրաբխի եզրով, ուսումնասիրել նրա ֆումարոլները, խառնարաններն ու ջերմային աղբյուրները՝ վայելելով այս հրաբխային շրջանի յուրահատուկ մթնոլորտը:

Գորելիում երկրաջերմային ակտիվությունը զարմանալի է. այցելուները կարող են տեսնել գետնից բարձրացող գոլորշի և ծծմբային լողավազաններ:

Անվտանգությունն առաջին տեղում է

Կամչատկայի հրաբուխները ապշեցուցիչ են իրենց գեղեցկությամբ, բայց նաև կարող են վտանգավոր լինել: Ճանապարհորդելուց առաջ միշտ հետաքրքրվեք տեղական ընթացիկ հրաբխային նախազգուշացումների կամ սահմանափակումների մասին:

Անվտանգությունն ապահովելու համար հրաբուխների շուրջ արշավների գնացեք գիդերի հետ:

Ինչպես հասնել այնտեղ

Այնտեղ կարող եք հասնել ուղղաթիռով, կամ քայլելով՝ արշավական խմբերի հետ։

Այցելելու լավագույն ժամանակը

Կամչատկայում ճանապարհորդելու լավագույն շրջանը ամառն է (հունիսից սեպտեմբեր), երբ եղանակն ավելի մեղմ է:

Ձմռան ամիսները կարող են լինել շատ դաժան, առատ ձյան և ցածր ջերմաստիճանի պատճառով։

Ինչ վերցնել

Անպայման վերցրեք հարմարավետ արշավային կոշիկներ, տաք հագուստ, ջրակայուն բաճկոն և առաջին օգնության պարագաներ:

Կամչատկայի լեռներում եղանակը կարող է շատ արագ փոխվել, նույնիսկ ամռանը, ուստի կարևոր է պատրաստ լինել ցանկացած իրավիճակի: